راكـــــــــــــــب الأمــــــــواج

حقيقي الأيام بتجري بطريقة غريبة .. وطبعا إحنا بنجري معها .. بس يا تري مين الأسرع .. طبعا (...) صح ولا إيه ... مش مشكلة مش مشكلة .. طب وهي إيه المشكلة .. المشكلة هو إن مافيش مشكلة .. يا عم صلي علي النبي مفيش مشكلة إيه بس ده إنت شكلك نايم علي ودنك ولا يمكن شكلك عايش في الروقان .. روقان .. روقان إيه .. ولا روقان ولا حاجة هو في روقان في الزمن ده .. سبحان الله أمال مفيش مشكلة إزاي ..طب سؤال ... يعني إيه مشكلة ... باقول ايه مش طالبة فزلكة هي لو ناوي تتفزلك حل عن سمايا .. لا ولا فزلكة ولا حاجة بس بجد يعني ايه مشكلة .. باقولك ايه انت شكلك خنيق وانا حاسيبك وماشي .. سلاااام

يا حول الله يا رب ... يا (....) ؟؟؟ إيه يا عم إيه أخبارك فينك من زمان مش باين يعني ... أهه تحت النظر يا عم دي بقت حاجة تخنق .. ايه بس مالك ..يعني متكعبل كده شوية مشاكل .. مشاكل مشاكل إيه خير ..أهه يا عم مشاكل في كل حاجة ما بقاش في حاجة عدلة ..طب معلش ممكن أسألك سؤال .. اتفضل ..هو يعني ايه مشكلة ؟؟ .. في ايه يا عم بتبص لي من فوق لتحت ليه ..هو انا قلت لك حاجة عيب ..  خد خد .. ياحول الله يا رب ده مشي

باشا .. ايه اخبارك .. الحمد لله ..الحمد لله ايه اخبار الدراسة معاك كله تمام ولا ايه .. اه الحمد لله كله تمام .. ايه عملت ايه الترم الاول .. اهه مية مية .. طب عال قوي .. باقولك ايه يا () انا عايز أسألك سؤال .. سؤال ايه .. سؤال عادي يعني .. إسأل ادينا قاعدين .. طيب .. يعني ايه مشكلة ...ههههههههههه .. يعني بروبلم ..هي هي هي هي هي هي هي .. ايه يا عم الظريف .. بتكلم بجد .. في ايه يا ابني انت فصلت ولا ايه .. فصلت .. فصلت ليه يا عم باكلمك بجد والله .. لالالالالا المرة دي ما سابنيش ومشي ده كان في مجموعة شباب كده معانا في الدفعة جايين وطبعا وقفوا يرزلوا علينا وضاع السؤااااااال

في مكان تاني بقي .. وانا ماشي بقي كده في الطريق سرحت في حاجات غريبة .. وذكريااات أاليمة ..وشوية شوية كنت هاغني في يوم في شهر في سنة تهدي الجرااح وتنام وعمر جرحي انا اطول من الايام  وشوية شوية كمان كنت هروح اقف علي الكورنيش واراقب الغروب واقول

عندما يميل قرص الشمس الدامي بين الأطلال أذكريني

وبعدين

آه وبعدين

ممكن كمان شوية كنت أقول

مالي النهاردة ايه جري لي الليلة غير كل الليالي نازل بادور في الشوارع والبيوت علي ذكري كانت بنا مش ممكن تموت وتحت شباكك بيرميني الحنين حيران بأقدم خطوة وارجع خطوتين أنا عايز أشوفك بس وأمشي

هي مين اللي عايز اشوفها

مش مهم

المهم ان انا عايز اشوفها بس وامشي

طب هي مين

سبحان الله ما قلنا مش مهم

مش مهم مش مهم انا مالي

وبعدين

وبعدين

ولا قبلين

خدتني العزة قوي

وقلبت بدل في يوم في شهر في سنة

خليتها

لا يالاقلبي سيبك ولا حبيبي ولا حبيبك

ما يستاهلش دمعة واحدة من دموعنا

لا يا قلبي بيعه زي ما هو باعنا

بس كان في سؤال ملح

ومحير جدا

هو مين ده اللي ما يستاهلش دمعة واحدة من دموعنا

الصراحة لغاية دلوقتي لسه بأدور علي الإجابة

وبعد كده بقي رحت الجيم

وقعدت اسمع حاجات غريبة كده ناس قاعدين يبرطموا بلغة غريبة

وفي الآخر طلعت أغاني أجنبي

فبأسأل الكابتن هي المغنية دي بتقول ايه

بص لي كده بصة غريبة

ساعتها كنت بأتمني ان الارض تنشق وتبلعني

مش عارف ازاي جت لي الجرأة إن أنا أسأل سؤال زي ده

وبعدت ما خلصت تمرينتي وظبطت المسائل

وانا راجع بقي

وفي شارع() كان في ذكريات فيه

اديتها بقي حتة

زي الليلة قابلتها ... زي الليلة عرفتها واتولدت جوايا مشاعر لقيتني بحبها

ما حدش بقي يقوللي هي مين 

لأن أنا نفسي مش عارف

 علي كل حال لما رجعت البيت بقي

الصراحة وانا راجع من الجيم وداخل البيت بابقي فاتح بقي

ومستعد آكل أي حد أمامي

علشان كده بقي اللي بيفتح الباب بيفتح الباب ويجري ياخد ساتر

وبعد ما دبيتها

الصراحة يعني

ولا بلاش

المهم

معلش اانا عارف ان ده سؤال جانبي

بس هو ده السؤال اللي نفسي اعرفه

هو ايه ده المهم

لو سألته لوالدتي

تقوللي مذاكرتك يا ابني

لو سألته لواحد صاحبي

يقولي طبعا ()

لكن لما باسأله لنفسي

بالاقي الجواب كالتالي

؟؟؟؟؟؟؟؟؟؟؟؟

وكمان

؟؟؟؟؟؟؟؟؟؟

وفي النهاية

بافتكر كلمة مش فاكر مين قالها لي

الشباب عمر ما حالها حينصلح غير لما تقوم الحرب

علشان كده

حالها مش حينصلح

قلت له ليه ما هو ممكن تقوم الحرب

راح ضحك من قلبه وقاللي

ما هو حتي لو الحرب قامت محدش منهم حيدافع عن أرضه

وراح منفجر في الضحك

وأنا كمان انفجرت

بس من الغيظ